በብሪትሽ መንደር በብሪትሽ ቀዬ
አገኘሁት ራሴን በደማቅ ተስዬ …

የእምዬ ምኒሊክ የአድዋ ጀብዱ
የአርበኞች ተጋድሎ የደም ስሪት ቅዱ
የታሪክሽ ስፌት በጦርና ጋሻ
በደማቅ ተጽፈሽ አየሁሽ ሃበሻ …

በብሪትሽ መንደር በብሪትሽ ቀዬ
አገኘሁት ራሴን በወግ ተሰቅዬ …

የሃይማኖት አድባር የእምነት መናገሻ
የእስላም የክርስቲያን መነሻ መድረሻ
የግማደ መስቀል የክቡር ማደሪያ
የማክዳ ጥበብ የጽዮን መዋያ …

የነጃሺ እትብት የሶሃቦች መኖሪያ
የታሪክ አውድማ የእውቀት መናሀሪያ
የስልጣኔ ፈርጥ የዘመን መታያ
ጎበኘሁሽ ዞሬ ጥበብ ኢትዮጵያ …

በብሪትሽ መንደር በብሪትሽ ጓዳ
አገኘሁት ራሴን ከርሞ ከግድግዳ …

በከሰል፣ በሙጫ፥ በዉሃ ተቀይጦ
የኢልሙ መክተብያ ‘መዱ’ ተበጥብጦ
በለውህ የታተመ የቁርአንሽ ለዛ
የሸሆችሽ ድርሳን ዝናሽን ሲያበዛ …

ዉብ የቁም ጥፈትሽ የብራናሽ መልኩ
የግዕዝ ምጣኔሽ የቀለምሽ ልኩ
የቅርጻቅርሽ ጥግ የአልባሳትሽ ዝሃ
የቄሱ መቁጠሪያ የኢማም ሙስበሃ
ሁሉን አገኘሁት ተሻግሮ በረሃ …

በብሪትሽ መንደር በብሪትሽ ቀዬ
አገኘሁት ራሴን በወግ ተሰቅዬ …

/ © አብዲ ሰዒድ፤ 2005 E.C
ብሪትሽ ሙዚየም፣ ለንደን /