RSS

Category Archives: ስብጥርጥር

ሸማኔው በብሪትሽ . . .

♫. . . ሸማኔው ደጉ … british33
ጠንካራው ብርቱ …
ኩሩ ባህልህ …
መለያ እምነትህ …
‘ማያልቅ ፈጣራህ …
ሰርተህ በዓለም …. ይታወስ ሞያህ …
ድብቅ ውለታህ …

ኦሆ ሸማ… ሸማ . . .
ኦሆ ሸማ… ሸማ . . .

. . . ወገን ሸማኔ የወንዜ የአገሬ
የትውልድ ገጽታ አሻራ ታሪኬ . . . ♫

(ድምፃዊት፦ ምንይሹ ክፍሌ)

ከላይ የጠቀስኩትን የምንይሹ ዘፈን በተደጋጋሚ ብሰማውም ከመደበኛ አድናቆት በዘለለ ለስሜቴ እጅግ ቅርብ ሆኖ ግጥሙን በወግ ያብሰለሰልኩበት ጊዜ ትዝ አይለኝም፣ እንዲሁ ምንይሹን ስለምወዳት አደምጠዋለሁ እንጂ!… (ሰፊው ህዝብ ግን ምንይሹን ይወዳት ይሆን? እምብዛም ስትንቆለጳጰስ አንሰማም:: ግን እኮ የምሩን ምርጥ ናት… ውይይ ጭፈራዋ ይምጣብኝ!… የኔ የባሕል አምባሳደር!… ስላንቺማ በሰፊው ነው መጻፍ ያለበት!… ስወድሽ፣ ሳደንቅሽ፣ ሳከብርሽ!)… ብቻ ዘፈኑ ውስጤ ዘልቆ ይሰረስረኝ የገባው በታላቋ ብሪታኒያ መዲና የሚገኘውን ብሪትሽ ሙዚየም ስጎበኝ ነው…

“ደግሞ ብሪቲሽ ሙዚየምና የሸማኔ ዘፈን ምን አገናኛቸው?!… ሽሮ ሜዳ የሄድክ መሰለህ እንዴ?!… አይ የባላገር ነገር የማይመሳሰለው ነገር ሁሉ ይመሳሰልበታል እኮ!” ብሎ የሚሳለቅ ከተሜ ከተገኘም ብሪቲሽ ሙዚየምም ሆነ እንዳጋጣሚ ያየኋቸው የስልጡኗ አውሮፓ ከተሞች ያመላከቱኝ ነገር ቢኖር ባለገርነትን አበክሮ ማየት፣ ማንነትን አብጠርጥሮ መለየት ብሎም “ይሄ ነገር አይረባም!” ብሎ ማንኛውንም ነገር ያለመናቅ ለብልጽግናቸው ያበረከተውን የላቀ አስተዋጽኦ ነው፡፡ እናም እንዳሻኝ ሸማኔን እና ብርቲሽ ሙዚየምን እያዛመድኩ በየዋህ የብልጽግና ምኞት እቀጥላለሁ… ደግሞ ለምኞት!…

 
ብሪትሽ ሙዚየም . . .

ብሪትሽ ሙዚየምን መጎብኘት በ’ርግጥ ዓለምን ጥንቅቅ አድርጎ እንደ መጎብኘት ነው ብዬ በድፍረት ብናገር የተለያዩ የዓለም ክፍላትን ባለመጎብኘት ምክኒያት የመጣ ግልብ ድምዳሜ ነውና መቻል ነው እንግዲህ!… በበኩሌ ግን ዓለምን ጎብኝቼ ተመልሻለሁ፡፡

የዛሬ 260 አመት የተቋቋመ፣ 250ኛ አመት የልደት በአሉን የዛሬ ዘጠኝ አመት ገደማ ያከበረ፣ በዓለም የመጀመሪያው በአገር አቀፍ ደረጃ የተደራጀ ሙዚየም የተባለ፣ በሚሊዮን የሚቆጠሩ የጉብኝት እቃዎችን የያዘ፣ በ18ኛው ክፍለ ዘመን በየአመቱ በአምስት ሺህ ሰዎች እንዲሁም አሁን ባለንበት ዘመን ስድስት ሚሊዮን በሚገመቱ ዓለም አቀፍ ጎብኚዎች የሚጎበኝን ሙዚየም መጎብኘት… ለኔ ብጤው ዓለምን ቀርቶ አለሙን ላላየ ዓለምን ጎበኘሁ ብሎ ቱሪናፋውን ቢነፋ አይገርመኒ ብላችሁ ማለፍ ነው እንግዲህ …

ብሪቲሽ ሙዚየም ሲባል የእንግሊዝን ጀብዱና ታሪክ ብቻ የሚዘክር የእንግሊዞች ሁለንተና ጥርቅም የተሞላበት አዳራሽ የሚመስለው ሰው ካለ በርግጥ ያ ሰው ልክ እንደ’ኔ ተሞኝቷል… ሙዚየሙ ያልያዘው የዓለም ጉድ የለም፡፡ የግብጾች፣ የሜሶፖታሚያ፣ የግሪኮች፣ የፐርሺያኖች፣ የጃፓኖች፣ የኮሪያዎች፣ የቻይናዎች፣ የአፍሪካዎች… ኧረ የስንቱ ስልጣኔና ቅርስ ተኮልኩሏል መሰላችሁ… የሰአት ታሪክ፣ የመገበያያ ገንዘብ ታሪክ፣ የጦርነቶች ታሪክ ስንትና ስንት ታሪክ ታጉሮበታል መሰላችሁ… ሙዚየሙን ጥንቅቅ አድርጎ ለመጎብኘት ቢያንስ አንድ ሳምንት እንደሚያስፈልግ የሙዚየሙ ጥናት ያመላክታል፡፡ ታዲያ እኔ ከሦስት ሰአታት ባልበለጠ ጉብኝቴ ስንቱን ላወራ ይቻለኛል?… እንዲሁ በወፍ በረር የቃረምኳትን ልተንፍስ እንጂ …

የአፍሪካ ጨርቃጨርቅ . . .

አፍሪካ የሚል ስያሜ የተሰጠው አዳራሽ የሚገኘው በታችኛው የሙዚየሙ ክፍል ሲሆን ደረጃውን ስወርድ “ለምን ታች አደረጉን? ያው አሁንም ካለም መጨረሻ ናችሁ እያሉን ይሆን?” እያልኩ ነገር እየፈተልኩ ነበር… ከዉስጥ ዘልቄ ስዘዋወር፣ የተለያዩ የአፍሪካ አገራትን አልባሳትና ልብሶቹ የሚሰራባቸውን ሁኔት ከተለያዩ መግለጫዎች ጋር ስጎበኝ “የደጉ ሸማኔ” የስራ ውጤት የሆነችው ጥበብ ዉበቷን ተጎናጽፋ ኢትዮጵያዬን ተሸክማ አገኘኋት… ውይ ደግሞ ማማሯ፣ ውይ ደግሞ ዉበቷ… ከሌሎች የአፍሪካ አገሮች አልባሳት ጋር ተሰልፋ ሳያት ስሜቴ ተደበላለቀብኝ… እንዲሁ በደመንፍስ የምንይሹን ዘፈን ማንጎራጎር ጀመርኩ… ከስልኬም ከፈትኩት፣ ጆሬዬም ላይ ሰካሁት፣ እጅግ የበዛ ትርጉምም ሰጠኝ…
እውነትም የትውልድ ገጽታ… እውነትም የታሪክ አሻራ… እውነትም የማንነታችን መታያ ስል ሸማኔዎችን አከበርኩ… ምንይሹንም አመሰገንኩ…

♫ . . . ወገን ሸማኔ የወንዜ የአገሬ
የትውልድ ገጽታ አሻራ ታሪኬ . . . ♫

በባህል…
__ ኮርተን እንድንታይ አ’ርገህ
በብሔር…
__ ባንድነት ልንዋብ ጥረህ
ገበናን…
__ ሸፍነን ኖረን አጥርተን
እምነትን…
__ በቀለም በጥበብ አፍርተን . . . ♫

♫ . . . መስቀላይ ሀሹ
ኡፋይሲ ሀሹ
ኦቶራ ኦቶ መኖራ አቀና…
መፃቤሳ … አሶሳ መኖራ ቀና
ኡፋይ … አሶሳ መኖራ ቀና . . . ♫
(የቋንቋው ባለቤት የሆናችሁ ብታርሙት ትችላላችሁ… ካበላሸሁት)

አብዲ ሰዒድ
2005 E.C

 

 
Leave a comment

Posted by on December 24, 2012 in ስብጥርጥር

 

ሸበላው በሼፊልድ (2) . . .

በንግሪቭ አደባባይ . . . sheffield

በእንግሊዟ ደብረሲና (ሼፊልድ) ከሸበላው ጋር መጀመሪያ የሄድነው ወደ በንግሪቭ አደባባይ ነበር፣ ይህን አደባባይ በርን ግሬቭም ይሉታል አሉ፡፡ እናም እንደደረስን ግራ ይገባኝ ጀመረ… ግራ መጋባቴን የተገነዘበው ሸበላው “እሺ ሸበላው መርካቶ አብዱ በረንዳ የመጣህ መሰለህ አይደል?” ቢለኝ… “አይ የለም ሲኒማ ራስ ነው የመሰለኝ” ሳቅ እያልኩ…

ያለምንም ማጋነን በርግጥ ሸገር የገባሁ ነው የመሰለኝ፡፡ ከሸገርም ቅልጥ ያሉ ጫትና ጥቃቅን ነገሮች መቸርቸሪያ ሰፈሮቿ የደረስኩ ያህል ነው የተሰማኝ… ታላቋ ብሪታኒያ ስለሚገኙ መቃሚያ ቤቶችና በእንግሊዝ ምድር ጫት መነገድም ሆነ መቃም ያልተከለከለ ስለመሆኑ የሰማሁ ቢሆንም በለምለም ኮባ ቅጠል የተጠቀለለ… የሸገርን ጫት ነጋዴዎች ሊቀታተር የሚችል ትኩስ ጫት በክብር እና በግርግር ሲሸጥ ያጋጥመኛል ብዬ ፈፅሞ አልገመትኩም!… በወግ የተስተካከለ መጅሊስ ያለበት መቃሚያ ቤት አገኛለሁ ብዬማ ፈጽሞ አልጠረጠርኩም!… ማንበብ ሌላ ማየት ሌላ ማለትስ ይሄኔ ነው…

የአካባቢው ድባብ፣ የቸርቻሪ ሱቆቹ ሁኔታ፣ የነጋዴዎቹ ባህሪ፣ ጫት ፍለጋ ገባ ወጣ የሚሉት ዲያስፖራዎች፣ የየመኒዎቹ ዎልፍና ትርምስ፣ የመስጂዱ የርቀት የአዛን ድምጽ፣ የዙሪያ ገባው ቆሻሻ፣ እዚም እዛም የወዳደቁት ፌስታሎችና ቆርቆሮዎች… ኧረ ምኑ ቅጡ ብቻ ምኑም አውሮፓ አውሮፓ አይሸትም! ሸገር ሸገር እንጂ፡፡ ከመጣሁባት ከወግ አጥባቂዋ ስውዲን ጋር እያነጻጸርኩ… ከእትብቴ ምድር ከኢትዮጵያዬ ጋር እያዋደድኩ መጠየቅ ጀመርኩ…

እኔ፦ ቆይ ግን ጫት እንዴት አልከለከሉም?!

ሸበላው፦ አይ ሸበላው! ለምን ብለው ይከለክላሉ?!… ዝም ድንዝዝ የሚያደርግን ነገር ለምን ይከለክላሉ?… ቃሚው ይቅማል ከዚያም ዝምም ብሎ ያኗኗር ዘይቤያቸውን በልምምድ ያውጠነጥናል… ታርጋውንና የተመዘገበበትን ታሪክ ያብሰለስላል…. ምን አደረገኝ ብለው ነው የሚከለክሉት?… አንድ ሰሞን ጫት ይከልከል ተብሎ ቆሞ ነበር አሉ ታዲያ አንዱ ሃራራ አናቱ ላይ የወጣበት ሱማሌ እዚሁ መሃል አደባባይ ላይ ቆሞ “አላህ ሃራም ያደረገውን ወንድና ወንድ መጋባት እየፈቀዱ ለምለም ቅጠል እንዴት ይከልክሉናል? ፋክ ኢንግሊዚ… ፋክ ኢንግሊዚ!” እያለ በጩኸት አቀለጠዋ…

እኔ፦ አሃሃሃሃሃ… ወይ ሱማሌ!… ቆይ ታርጋ ምንድነው? የምን ታርጋ?

ሸበላው፦ አገር ቤት መኪና ነው ታርጋ ያለው አይደል… እዚህ ደግሞ ላንተም መለያ ቁጥር ይሰጥሃል… ያው ታርጋህ እንደማለት ነው… ኮሽታህ ሁሉ ይመዘገብበታል… አለቀ:: ስለዚህ ወደድክም ጠላህም ነጋ ጠባ እርምጃህን ከታርጋህ ጋር ታዛምዳታለህ… የኛ የትራፊክ ፖሊሶች ታርጋ እየፈቱ ሾፌሮችን እንደሚያበሳጩት ሁሉ እዚህም ታርጋህ ላይ ጥቁር ነጥብህን እየለጥፉ ናላህን ያዞሩታል … ሲስተም ነው የሚሰራው የሚሉት ፈሊጥ እዚህ ነው የሚገባህ… አጀብ ነው አቦ!

እኔ፦ ያው በሁሉም የሰለጠኑ ሃገሮች እንደሱ መሰለኝ…. ብቻ ይገርማል…. ይህ ሰፈር ግን ነገሩ ሁሉ አገር ቤት አገር ቤት ይመስላል…

ሸበላው፦ ነው እኮ ነው ታዲያ!… ይህ ሁላ ሸበላ አንገቱ ላይ ስካርፕ ጠምጥሞና አለባበሱን ለውጦ ስታየው እውነት እንዳይመስልህ… ለመመሳሰል እኮ ነው… ልቡም፣ ግብሩም፣ ህልሙም እዛው ነው − እናቱ ቤት፡፡ የኛ ሰው አገር እንጂ አመል አይለውጥም!… ህዝባችን አህጉሩ እንጂ ግብሩ አይቀየርም!… በየሄደበት የራሱን አገር ይገነባል… ታዲያ ሌላውም ሰፈር እንዲህ እንዳይመስልህ… የቀለጡ የፈረንጅ ሰፈሮች አሉልህ…

እኔ፦ እሱስ ልክ ነህ…

ሸበላው፦ እንግዲህ ክተበው!… ለምን እዚህ ያመጣውህ ይመስልሃል?!… ሸበላው ወዳጃችን ትጽፋለህ ስላለኝ እኮ ነው!… አየህ ሰው ነው የሚጻፍ…. ስለ ሰው ነው የሚከተብ… እንጂማ ምድር ያው ምድር ነው… ግንብም ያው ግንብ ነው… ወላሂ የሚከትበን አጥተን እንጂ ስንት ጥራዝ ይወጣን መሰለህ… እስቲ ደሞ ወደ ሻምበል እንሂድ (መኪናውን እያሽከረከረ)…

ቀልደኛው ሻምበል . . .

በ1981 (እ. ኢ. አ) ስለተደረገው የከሸፈ የመፈንቅለ መንግስት ሙከራ… በጓድ መንግስቱ ሐይለማሪያም እና በጀነራሎቹ መካከል ስለነበረው ሽኩቻ… አያ መንጌ ከጀርመን ሲመለስ አየር ላይ እንዳለ እሱን አመድ አድርጎ አብዮቱን ለመቀልበስ ስለተዶለተው ያልሰመረ ዱለታ… ስለጀነራሎቹ ፍጻሜ እና ስለ ጦር ሰራዊቱ የተለያየ ውጥንቅጦች ከየመጽሃፍቱ ከመቃረም በቀር ክዋኔውን በቦታው ሆኖ የታዘበ አሊያም በከፊልም ቢሆን የታሪኩ አካል የሆነ ሰው ገጥሞኝ አያውቅም… ኧረ ያጋጥመኛል ብዬ አስቤም አላውቅ… በእንግሊዟ ደብረሲና ግን ቀልደኛው ሻምበል ጥርስ በማያስከድን ጨዋታው እያዋዛ ልክ ትላንት የተፈጸመ ያህል ሲተርከው ሳይ ወይ ስደት ስንቱን ይዞታል ብዬ ከመቆዘም ሌላ ምን ልል ይቻለኛል…

“አባቴ ያቺን ሰዓት” በሚል ርዕስ በደረጀ ደምሴ ስለ ሜጀር ጀነራል ደምሴ ቡልቶ (የጸሃፊው አባት ናቸው) የተጻፈውን መጽሃፍ የወጣ ሰሞን ማንበቤን አስታውሳለሁ… በጀነራሉ ቆራጥነት፣ ለአላማቸው ባላቸው ጽናት፣ ስለ ጦር ሳይንስ ባላቸው እውቀት መደመሜም ትዝ ይለኛል… አስመራ ከተማ ላይ ስለነበራቸው የመጨረሻ ሰአት ቆይታና ስለህወታቸው ፍጻሜም ያነበብኩት ባይኔ ላይ አለ… እሳቸው በተገደሉበት በዚያች ቅጽበት በቦታው ኖሮ በጆሮው ግራና ቀኝ ጥይት እያፏጨ… ፍጻሜያቸውን የተመለከት፣ የወጡበትን መኪና እስከነታርጋ ቁጥሩ፣ እስከነ ሞዴሉ፣ እስከነአለባበሳቸው፣ እስከነአወዳደቃቸው ፊልም በሚመስል መልኩ የሚተርክ ሰው ማግኘት ግን ከማንበብም በላይ ደስ የሚል ነገር ነው…

ስለ ሜጀር ጀነራል ቁምላቸው ደጀኔም ቢሆን ያው ስለ አብዮቱ ከተጻፉ መጻህፍት እንዳቅሚቲ ቃርሜያለሁ… እንዴት ከሞት እንዳመለጡ፣ እንዴት ጉራጌ አካባቢ እንደተሸሸጉ፣ እንዴት ከሃገር እንደወጡ በመጠኑ ለቃቅሜያለሁ፡፡ የሚኪሊላንድ ታሪክና የሳቸው ካገር አወጣጥ በርግጥ እንደፊልም መስጦኝም ነበር… የደብረሲናው ሻምበል ይህንንና መሰል ታሪኮችንም በሳቅ ፍርስ በሚያደርጉ የጦር ቤት እና የራሽያ ትምህርት ቤት ገጠመኞች እያዋዛ ተረከልኝ… በዚህ አጋጣሚ ምነው ግን ፊልም ሰሪዎቻችን እኒህን ታሪኮች ቢሰሯቸው!… ቀን ከሌት የምናየውንና የምንኖረውን ኑሮ እየደጋገሙ ከሚያሰለቹን እኒህን እና መሰል ታሪኮች ጣል ቢያደርጉልን ይጣፍጥላቸው ነበር… እግረ መንገዳቸውንም ለትውልድ ታሪክ ያስተምራሉ እኮ… (ጥቆማ መሆኑ ነው እንግዲህ… በኛ ቤት ጠቁመን ሞተናል…)

ስለ ኢትዮ ኤርትራ ጦርነትስ ቢሆን በወቅቱ አገር ቤት በግል ስራ ተሰማርቶ ይኖር የነበረው ሻምበል ካለበት ተፈልጎ ተጠርቶ ጦሩን እንዳገለገለ ሲነግረኝ ተገርሜም አላባራሁ… “ከውትድርና ህይወት የራቀ ሰላማዊ ኑሮ ውስጥ ለአመታት ቆይቶ ወደ ጦርነት መመለስ አይከብድም?” ስል እንደዋዛ ለጠየቅኩት ጥያቄ የመለሰልኝ ግን በአእምሮዬ ይመላለሳል…. “እንዴ!… የጦር ባለሙያ እኮ ዋና ተግባሩ አገር መጠበቅ ነው… እኔ አሁንም ቢሆን አገርን የሚነካ ነገር ከመጣ ዛሬም እሄዳለሁ… ያቅሜን ላገሬ ለማበርከት አላንገራግርም…. ጉዳዬ ከአገር እንጂ ከማንም አይደለም… ይሄ ደሞ እኔ ብቻ ሳልሆን ማንኛውም የጦር ባለሙያ የሚጋራው ነው:: የሚያሳዝነው ግን ከዚያ ሁሉ የኢትዮ ኤርትራ ጦርነት ከንቱ እልቂት በኋላ ባለስልጣን ተብዬው የድሮ የጦር ባለሙያዎች ስላደረጉት እገዛ ሲጠየቅ ሽምጥጥ አድርጎ የ’ኔንና የመሰሎቼን ውለታ ከመካዱም በላይ ʻምን አብዛኛዎቹ እንኳን ለዚህ አላማ ቀርቶ ራሳቸውንም ማገዝ አይችሉም!ʼ እያለ ከንቱ መሳለቅ ሲሳለቅ ስትሰማ ያምሃል”…. ወይ ሻምበል!

ብቻ በዚህም ተባለ በዚያ የዚህ አይነት ሰዎች የታሪክ ህያው ምስክሮች ናቸው፡፡ ለታሪክ ጸሃፊዎችም የሚያበረክቱት ሚና ቀላል አይደለም… በየሃገሩ በርካታ ተመሳሳይ ሰዎች እንደሚኖሩም እሙን ነው፡፡ ምነው በሰላም ተሰባስበው… በዳይና ተበዳይም ይቅር ተባብሎ ለቀጣይ ትውልድ ታሪካቸውን በቀናነት ቢያካፍሉን ስልም የየዋህ ምኞቴን እየተመኘሁ ሸበላውን አየሁት… መደዱን ይቀጥልልኝ ያዘ . . .

እህሳ ሸበላው
አያዋ ጎምላላው
እንግዲህ ክተበው በል ጣፈው አደራ
አንዳች ቢያስተላልፍ ለወዲያኛው ጭፍራ. . .

ኡመቱ በሞላ
እንዲሁ ሲጉላላ
ደጅ ደጅ እንዳየ ውጪ ውጪ እንዳለ
ህልሙን ህልም በላው ቀኑን የትም ጣለ
እስቲ አላህ ያግራው ቀኝ በቀኝ ያ’ርግልን
ምቀኛ ሸረኛን ምንገድ ያስቀርልን. . .

ሸበላው ሸበላው ሸበላው ወዳጄ
መቼም ወገኔ ነህ መከታ ቀኝ እጄ
አንተ ትብስ አንቺ ብሎ እየተነሳ
በደቦ እንዲደቃው የቂምን ነቀርሳ
አሚን በል ዘመዴ ብርቱ ዱዓ አለብን
እምዬና ህልሟ ከንቱ ዳይቀርብን. . .

 

አብዲ ሰዒድ
2005 E.C

 
2 Comments

Posted by on December 19, 2012 in ስብጥርጥር

 

ሸበላው በሼፊልድ (1) . . .

ሸበላው ሸበላው፣ ሸበላው ዘመዴ
የወንዜ ኮበሌ አያ እንዴት ነህ ጓዴ?!sheffield
እስቲ አሏህ ያግራው ቀኝ በቀኝ ያ’ርግልን
ምቀኛ ሸረኛን ምንገድ ያስቀርልን . . .

ያኛው በስንቱ ጉድ ሲያራኩተን ከርሞ
አሰብን ሊሻገር ሌላው መጣ ደግሞ
መገን ያገሬ ሰው ተው በሉት ያን ከንቱ
አጉል አትራቆት ያች ምስኪን እናቱ . . .

የዋዛ እንዳይመስልህ ያ የጨው በረሃ
ስንቱን አቅልጦታል እያሰኘ ውሃ
እንጂማ ማን ጠልቶ 
ሁሉ ልቡ ፈርቶ 
በስጋት ተብላልቶ 
እንጂማ ማን ሸሽቶ ከጋራ ገበታ
ዳህላክ ውጦት እንጂ የተስፋውን ሽታ . . . 

ሸበላው ሸበላው፣ ሸበላው ዘመዴ
እንኳን ደህና መጣህ አያዋ መውደዴ
በል ተነስ ላስጎብኝህ ይቺን “ደብረሲና”
በእንግሊዝ ምድር የህልሜን መዲና . . .

በሃገረ እንግሊዝ በሼፊልድ ምድር ላገኘሁትና በቀልድ እያዋዛ አክራሞቴን ከሌሎች ፍቅር ከሆኑ ወዳጆች ጋር ላጣፈጠልኝ ሸበላው ጓዴ የተገጠመ፡፡ ሸበላው፣ ሃጂ፣ ሻምበል፣ ጆኒ እንዲሁም ፍቅር አቅርበው፣ ፍቅር መግበው የማይሰለቻቸው እህቶቻችን ሰላማቸው ይበዛ ዘንድ በደብረሲና አድባር እየተለማመንኩ እስቲ ትንሽ የቃረምኩትን ላጫጭስላችሁ…. ልክ እንደቡናቸው ጭስስስስስስ… 

ወይ ስደት፣ ወይ ኑሮ፣ ወይ ህይወት፣ ወይ ታሪክ፣ ወይ ጦርነት፣ ወይ ጥበብ፣ ወይ ETV፣ ወይ ESAT፣ ወይ መሌ፣ ወይ ሐይሌ፣ ወይ መንጌ፣ ታጋዩ፣ አታጋዩ፣ ተታጋዩ ስንቱን አነሳን ስንቱን አፈረጥነው… በጉንጭ አልፋ ክርክር ሳይሆን ለዛ ባለው የጨዋታ ወግ… ጉዞዬ የብልጭ ድርግም ያህል ቢሆንም ዳግም ልመለስ ቀጠሮ አለኝና ጥቂት ከማለት አያቦዝነኝም… 

ሼፊልድ ከስምንት ታላላቅ የእንግሊዝ የክልል ከተሞች አንዷ ስትሆን ከግማሽ ሚሊዮን በላይ ህዝብ ይኖርባታል፡፡ ከ 13ኛው ክፍለ ዘመን ጀምሮ በገበያ ማእከልነት ስታገለግል የቆየች ቢሆንም የከተማነት ካባዋን ተከናንባ ታፍራና ተከብራ መኖር የጀመረችው የዛሬ 120 አመት ገደማ እንደሆነ ስጎለጉል ያገኘሁት መረጃ ይገልፃል፡፡ በኢንዱስትሪና በብረታብረት ምርቷ የምትታወቀው ሼፊልድ በሁለተኛው የአለም ጦርነት የጦር መሳሪያ አምራችም ነበረች… በምላሹም የቦንብ ውርጅብኝን አስተናግዳለች… ያኔ ለሞተባቸው መጽናናትን ይስጥልን… አሁን ነዋ እኛ ለቅሶ የደረስነው!… aha… 

የከተማዋ ተፈጥሯዊ አቀማመጥ ገደላማ ነው በዚህም ያገኘኋቸው ወዳጆቼ ሼፊልድ የሚለውን የኢንግሊዝ ስያሜ በአገርኛ ለውጠው ደብረሲና እያሉ ነው የሚጠሯት… የደብረሲናን ዋሻ ከተሻገርኩ በኋላ በሚምዘገዘገው የአንበሳ አውቶቡስ አቧራም፣ እድሜም የጠገቡትን የደብረሲና ከተማ ቆርቆሮዎች እየታዘብኩና እየቆዘምኩ ቁልቁል እንደወረድኩት ሁሉ የእንግሊዟንም ደብረሲና በናሽናል ኤክስፕሬስ ባስ እየተገረምኩ ቁልቁል ወረድኳት… የዚህኛው ጉዞ ላይ ግን የደብረሲና ቆሎ ቸርቻሪ ኮረዳዎች የሉም… እነዚያ ፍልቅልቅ አበባዎች አይታዩም!… “ቀዮ ቆሎ ተጋበዝልኝ”… “ቀዮ ጦስኝ ውሰድማ”… “ቀዮ ብርትኳን”… “ቀዮ መንደሪን”… “ቀዮ ቆሎ… ግዴለም ተጋበዝ… ስትመለስ ትከፍለኛለህ”… ሲሉኝ አይሰማኝም… ከባስ ወርጄ በዱክትርና መርሃ ግብር ትምህርቱን ሊከታተል ሼፊልድ ከከተመው አብሮ አደግ ወዳጄ ጋር ከተገናኘሁና ሸበላውን ከተዋወቅኩ በኋላ ግን ቆሎ ቸርቻሪ ኮረዳዎቹን ብቻ ሳይሆን ህዝቤን ከነዘዬው አገኘሁት… አይ ሸበላው…

ከሸበላው ጋር እንቀጥላለን… ይቀጥላል . . .

 
Leave a comment

Posted by on December 16, 2012 in ስብጥርጥር

 

የተዘነጋ ገፅ . . .

እ – ህ – ህ… ወ – ፍ – ዬ . . . ኡ – ሁ – ሁ… ወ – ፊ – ቱ . . .
ከሚለው የአበበ ተካ ዘፈን ጋር ለአመታት የከረመው ፍቅሬ ሰሞኑን አገርሽቶ (ምን እንደቀሰቀሰው ባይታወቅም) እንደገና እንደ አዲስ ከወፍዬ ጋር እየዘመርኩ፣ እያፏጨሁ… አብሬያት አለሜን እየቀጨሁ… የግጥሙን ርቀት… የጥበቡን ጥልቀት ሳብሰለስል… ፍቅርና ወፍ፣ ወፍና ጎጆ፣ ጎጆና ሰው፣ ሰውና እምነት፣ እምነትና ተፈጥሮ፣ ተፈጥሮና ህይወት ምናምን እያልኩ ማደበላለቅ ሲያምረኝ… ሲያመራምረኝና ሲመረምረኝ… ገጣሚው ባይኔ ላይ ይዋልል ገባ… ስምም፣ ክብርም፣ ብርም ተነፍጎት ያለፈው ሙሉጌታ ተስፋዬ… ሰላማዊ እረፍት ሙሌዋዋዋ… በዚሁ ዋዋዋ ልበል እንጂ !

ድምጻዊ አበበ ተካ በአንድ ወቅት የሙዚቃውን ገበያ የተቆጣጠረ… በቅንጣት ዝና የከበረ… ዘፈኖቹ እንደጣፋጭ ቡና እየተደጋገሙ የተጣጣሙለት ምርጥ ዘፋኝ እንደነበር የ1988ቱን የኪነ ጥበብ ፌስቲቫል እና የአቤን ሽልማት (እንዲሁም ለቅሶውን…) ማስታወስ ብቻውን በቂ ነው፡፡ ቆይ ግን አቤ የት ገባ? በቃ እልምምም?!… “ያ ሱዳን ፈናኒ” እያለ ቼቺኒያን እንዳላቀናት እንዲህ ድምጹ ጥፍት?…. ኧረ አቤ አንተ ያቀናሃት ቼቺኒያ ዛሬ ራሷን የቻለች አገር ሆና ምግብም፣ ጥበብም፣ ህይወትም፣ ሞትም እየተቸበቸበባት ነውና እንዳቀናሃት ካለህበት መጥተህ አቃናት ብያለሁ እግረመንገዴን . . .

እና እንደዚያ አቧራ ያጨሰ የነ ወፍዬ ዘፈን አልበም መላው ግጥሞቹ (ከአንድ ዘፈን በስተቀር) የሙሌ እንደሆኑ ሳስብ ያለዋዛ እንዳልተወደዱ ገባኝ… አበበ ተካ ከዚህ አልበሙ በፊት የቀደመ አልበም ነበረው እምብዛም አይታወቅም… እናም ለአበበ ዝና ሌሎች በርካታ ተጨማሪ ተዛማጅ ጥበቦች ቢኖሩም ቅሉ የሙሌ ጣፋጭ ግጥም የአንበሳውን ድርሻ እንደሚወስድ ማንም አይክድም!
*
ማነው ደግሞ ያ ድሮ ጥርሰ ወርቅ የነበረው አሁን ግን ጥርሱ ሃጫ በረዶ የሚመስለው ዘፋኝ?… ያ ነዋ የጥቁር ውሃው ልጅ?… ታምራት ደስታ አትሉኝም!… ታምራት ደስታ የቱ?… ብንባል ብዙዎቻችን ታምራት “ሃኪሜ ነሽ” ነዋ ብለን እንደምንመልስ ጥርጥር የለኝም… ለምን ቢባል ታምራትን ካለመታወቅ ወደ መታወቅ ከከተፋ ቤት ወደ አደባባይ ይዛ የወጣች ዘፈን ሃኪሜ ነሽ ናትና !

♫ . . . ሐኪሜ ነሽ መድሃኒቴ
ፈዋሼ ነሽ እመ እምነቴ
ሐኪሜ ነሽ መዳኒቴ
እኔ አዳም
ብሞት አንቺንስ አልከዳም . . . ♫

♫ . . . አንቺን የመሰለ ሌላ ሰው ቢኖርም
ላይን ይሞላል እንጂ ለነፍስ አይዘምርም
ጠረንሽን ለምጄ እንደ ናርዶስ ሽቶ
ሌሊቱ እንዴት ይንጋ ቀኑስ እንዴት መሽቶ . . . ♫

የዚህም ግጥም ጌታ የታሜ ባለውለታ አሁንም ሙሌ ነውና ክብር ለሙሌ . . .

*
♫ . . . አደራ ልጄን አደራ
ሆዴን ልጄን አደራ . . . ♫

የሚለውን የብጽአት ስዩም ዘፈን ያደመጠ፣ የወለደና እና የከበደ ዘፈኑን ሲሰማ ወይም የብጽአትን በእንባ የተሞላ አዘፋፈን ሲያይ ልጁን ብሎም እናቱን እያሰበ በፍቅር እንደሚቃጠል ዘፈኑን ያደመጠ ቢፈርድ ይሻለኛል. . .

♫ . . . ወልደህ እየው ብሎ ወላጅ የመረቀው
ለልጅ ሲንሰፈሰፍ ያኔ ነው የሚያውቀው
እርብትብት ከንፈሩ ያንገቱ ስር ሽታ
ከሞትም ያድናል እንኳን ከበሽታ . . . ♫

♫ . . . ባልማዝና በእንቁ በከበረ ድንጋይ
አሽቆጥቁጬ አኑሬሽ በሆንኩሽ አገልጋይ
ምናለ ለእምዬ ውሃ ሸጬስ ባድር
ማን ውጪ እንዳይለኝ ካገርና ከእድር . . . ♫

ይህን የመሰለ መቼም ሊደመጥ የሚችል ዘፈን እንዲሁም ሌሎች የአንድ ሙሉ አልበም የብጽአት ዘፈኖች የሙሌ ናቸውና አሁንም ክብር ለሙሌ!… የፀደኒያ ገብረማርቆስ፣ የሃና ሸንቁጤ፣ የመሰረት ሌላም ሌላም… እያሉ መዘርዘር ይቻላል…

እንደው ወፍዬ ኮርኩሮኝ አነሳሁት እንጂ እጅግ የበዙትን የባለቅኔውን የዘፈን ግጥሞች እዚህ ዘርዝሬ አልዘልቀውም… ምናልባት እየቆራረጥን በተለያየ ግዜ መነካካት የቻልን እንደሆን እንጂ!… ግና የዚህ ሁሉ ጥበብ ባለቤት የሆነ ታላቅ ሰው እንደምንምና እንደማንም ተዘንግቶ ሲቀር ማየት በ’ርግጥ ያማል፡፡ ስንዱ አበበ እጅግ የበዛ ክብርና ምስጋና ይግባትና የተወሰኑትን ስራዎቹን ሰብስባ “የባለቅኔ ምህላ”ን አሳትማልናለች… “ጉኖዬ” አክብሮታዊ ምስጋናዬ ባለሽበት ይድረስሽ… ላሁኑ የዘፈን ስራዎቹ ላይ ብቻ ነኝና ስንዱ በመጽሐፉ − ደብዳቤ ለ“ሲኦል”− ስትል ስለ ሙሌ ከጻፈችው ትንሽ ልቆንጥር…

“. . . ይህንን ይሁን ብዬ ጓዶቼን ፈትቼ፣ ህዝቤን አምኜ፣ ችሎታዬን ለዘፋኞች ልስጥ አልኩና ተነሳሁ፡፡ ገበያው እጅግ የደራ ከመሆኑ የተነሳ እንኳን ሌላ ነገርሽን ከዓይንሽ ላይ ኩልሽን ሊሰርቁሽ የሚችሉ ሰዎች የበዙበት ሆነ፡፡ ይህን ትልቅ የገበያ ስፍራ ለመቀላቀል ስንት አሳር እንደቆጠርኩ ዛሬም ሳስበው ይዘገንነኛል፡፡ በቃ የስልጣናቸው የመጨረሻ ዳር ድንበር አሁን ትዝ አለኝ! “የኢኮኖሚው ባለቤት የፖለቲካውም ዋና ባለቤት” እንደሆነ ሁሉ የስራው ባለቤቶች ነጋዴዎች ብቻ ሆኑ፡፡

. . . “እኔ እበላ − እኔ እበላ” እያሉ ከሚሻሙት ጋር ለጨው ለበርበሬ፣ ለውሎ ላዳሩ እንኳ ብዬ አብሬያቸው ለመቆየት አቃተኝ፡፡ ይልቅ ጠጋ ያሉኝ ጋር በማርያም መንገድ፣ በማተብ በክርስትና ለየግል ተነጋግረን፣ ቀኑን አሳምረን፣ ዱአ አድርገን፣ ተፈጥሮንና ፈጣሪን ሳይቀር እያፋጠጥን አብረን ጎጆ ልንወጣ ሰርተን ፈረንካው ሲገኝ አይኔን ለማየት እንኳ ይፀየፋሉ፡፡ አልፈው ተርፈው ብኩርናዬን ሳይቀር እንድሸጥላቸው ሁሉ ጠየቁኝ፡፡

. . . ስሚ ʻንጂ አንድ ቀን “ያንተን የተለያዩ ዘፈኖች መደዳውን ዛሬ አራት በኤፍ ኤም ሰማሁ ብለሽ” በልብሽ ያጨበጨብሽልኝን ዕለት አስታውሼ ምን ትዝ አለኝ መሰለሽ! ያወጣሁላቸው ስሞች! ታምራት ሃኪሜ ነሽ፣ መሰረት ጉምጉም፣ ፀደኒያ ገዴ፣ ብፅአት ገዳዬ፣ ሸህ አብዱ ሃዋብስል ኧረ ስንቱን አድምቄዋለሁ አያ! ምንስ ቢሆን ሙሉጌታ ተስፋዬ ወዲ ሀለቃይ! ተጋዳላይ ነኝ’ኮ! … ” (የባለቅኔ ምህላ፣ ገፅ 133)

እስቲ ደጋግመን እናንብበውና ከባለቅኔ ምህላ ጋር ደግሞ እንመለሳለን… የቻላችሁ አንብቡትማ!… ዛሬም በርካታ ሙሌዎች በዙሪያችን ይኖራሉና ክብር ለጥበበኞች. . . ነጃ ይበለን እያልን በሃና ሸንቁጤ ዘፈን (በሙሌ ግጥም) እንሰነባበት . . .

“ነጃ በለኝ ወሎ ነጃ በለኝ ነጃ
ነጃ በለኝ የጁ ነጃ በለኝ ነጃ
ታውቀዋለህና የፍቅርን ደረጃ . . .

አንዴ በንጉርጉሮ አንዴ በመንዙማ
ሲያወድስ ይውላል የፍቅርን ከራማ !
አጠገቡ ሆኘ እሱን እየካደምኩ
ከራማው ገብቼ ሳጫጭሰው ባደርኩ !
እናቱ ዱበርቲ አባቱ ሼህ ናቸው
አድርገው ያሉትን የሚያደርግላቸው . . . ”

ሰላም!
አብዲ ሰዒድ

ፎቶ: ከስንዱ አበበ ፌስ ቡክ ገጽ የተገኘ!

 
2 Comments

Posted by on November 27, 2012 in ስብጥርጥር

 

ገርሞ… ገርሞ… ደግሞ ገረመኝ…!

ከየት እንዳመጣችው ባላውቅም እናቴ ደስታዋ አልያም ትዝብትዋ ከመገረም በላይ ሲሆንባት ሁሌም የምትላት ነገር አለቻት… “ገርሞ…ገርሞ…ደግሞገረመኝ!”… ʻየምር ለአፍሪካ ዋንጫ አልፈናል አይደል?ʼ… እውን ከነ ናይጄሪያ፣ ከነዛምቢያና ቡርኪናፋሶ ጋር ተደልድለን ልንፋለም ነው አይደል?… እውን እምዬ ጦቢያም ወግ ደርሷት ከእግር ኳስ ተፋላሚ አገሮች ተርታ ተሰልፋ ላያት ነው አይደል?… እያልኩ ደግሜ ደጋግሜ ሳሰላስል፣ የኳስ ደስታንና ያገር ደስታን ሳብሰለስል፣… ምክንያቱን የማላውቀው እምባ አይኔን ሲሞላው ዝም ብሎ ይገርመኛል (ጅል ነኝ አይደል?…) ይገርም ይገርምና ይወስደኛል… ጭልጥ አድርጎ  ይወስደኛል ወደ ዘመነ ቼልፊኮ… ወደ ዘመነ መንግስቱ… ወደ ዘመነ አዋድ… ወደ ዘመነ ሉችያኖ… ወደ ዘመነ ተስፋዬ… ወደ ዘመነ ስኬት… ወደ ዘመነ ዝና… ወደ ዘመነ ክብር… ከዚያም ቼልፊኮና እግር… እግርና አገር… አገርና ፍቅር… ፍቅርና ክብር…. ይደበላለቁብኛልና እንዲህ እላለሁ . . .

በቼልፊኮ ጫማ እግር እየደማ

በ’ናት አገር ፍቅር ልብ እየተጠማ

ስንት ታሪክ ታየ ስንት ጉድ ተሰማ . . .!

ቼልፊኮ የድሮ የኢትዮጵያ ተጫዋቾች የእግር ኳስ መጫወቻ ጫማ ነው… ይህ ጫማ የሚሰራው እያንዳንዱ ተጫዋች ባዶ እግሩን ወረቀት ላይ ከተለካ በኋላ ሲሆን፣ ሁሉም በየልኩ ሶሉ በሚስማር እየተመታ ይዘጋጅለታል… በጨዋታ መሃል ሶሉ ሊገነጠል ስለሚችልም የዛን ጊዜ ወጌሻዎች መዶሻ ይዘው ወደ ሜዳ ይገቡ ነበር ይባላል… ʻአጃኢበ ረቢ!ʼ አትሉም!?… aha… እንደውም ባንድ ወቅት መንግስቱ ወርቁ ገጠመኞቹን ሲያወራ “ያፍሪካ ዋንጫን በወሰድንበት ጨዋታ ጎል ካገባሁ በኋላ የቸኮልኩት ዋንጫውን ለመውሰድ ሳይሆን ጫማው እግሬን የወጋኝን ቶሎ ፈትቼ ለመገላገል ነው” ሲል በማስፈገግ የጫማውን አስቸጋሪነት ጠቁሞ ነበር…

የጎንደር ልጅ ነው ያውም የቋራ

መንግስቱ ወርቁ ልበ ተራራ …!
(ያዝማሪ ዘፈን)
ግን መንግስቱ ወርቁን የሚገባውን ክብር ለግሰነው ይሆን?!… አይመስለኒ!… ብለን ትንሽ ብናስታውሰውስ?!… መቼም የሚዘከሩት ሌሎች ሲሆኑ ገረመንና “የነሱ ፈቃድ ይሁን ብለን ዝም አልን!”… aha… መንጌ ፊት አውራሪው… መንጌ ጎንደሬው… መንጌ አድባሩ… መንጌ 8 ቁጥሩ… መንጌ የእምዬ ባለውለታ… ደግሞ እኔ ያወጣኋቸው ስሞች እንዳይመስሏችሁ… ሲሞገስበት የነበረ እንጂ!እኛ እንኳን ባቅማችን ድሮ ቢንጎ ስንጫወት B8 ሲወጣ “B መንግስቱ ወርቁ!” ብለን በመጥራት የማስታወስ ሙከራ አድርገንለት ነበር… ብሔራዊ ሎተሪ ሰምቶ ቢንጎ ሎተሪን ሲያዘጋጅ በማጽደቅ አልተባበረንም እንጂ! … aha
በሰባት የአፍሪካ ዋንጫ ጨዋታዎች አገርን ወክሎ መሰለፍ፣ ባፍሪካ ዋንጫ ታሪክ ከሰባት ምርጥ ጎል አግቢዎች አንዱ መሆን (10 ጎል በማግባት)፣ ብሔራዊ ቡድንን በማሰልጠን ላፍሪካ ዋንጫ ውድድር ይዞ መቅረብ፣ ከ115 በላይ አለም አቀፍ ጨዋታዎች በላይ መሳተፍ፣ ከ 65 በላይ ጎሎችን ማስቆጠር፣ በዘመኑ ምርጥ በመሆኑ በጣልያን፣ በግሪክ፣ በስፔይን፣ በፈረንሳይ እና መሰል ሃገሮች እንዲጫወት ተጠይቆ የነበረ መሆኑ እና ሌሎች ብቃቶቹ… ክብር የማይገባው ተራ ነገር ይሆን?!.. ያው የኳስ እውቀቱ ስለሌለኝ የሚመለከታቸው እነ ጋዜጠኛ አበበ ግደይ ወይም ሌሎች እንዲተነትኑት ትቼ ዝም ብዬ መገረሜን ልቀጥል… (የምር ግን ሁሉም ነገር በባለሞያ ሲተነተን አሊያም ሲሰራ ደስ ይላል… ሙዚቃውንም ፖለቲካውንም… ምኑንም ምኑንም ደግሞ ከኔ ወዲያ ብሎ መፈትፈት ሼ ነው እኮ!…. ኧረ ሼሼሼሼሼ…. aha…)
አዋድ ሞሃመድስ ቢሆን በአምስት የአፍሪካ ዋንጫዎች ከመሳተፉም በላይ ኢትዮጵያችን እስካሁን ጉራዋን የምትቸረችርበትን ብቸኛ ዋንጫ ስታነሳ ከነሉችያኖ፣ ከነኢታሎ፣ ከነጌታቸው፣ ከነአስመላሽ፣ ከነክፍሎም፣ ከነበርሔ፣ ከነመንግስቱ፣ ከነተስፋዬ፣ ከነግርማ እንዲሁም ከግብ ጠባቂው ጊላሚካኤል ጋር አብሮ የጨፈረ ተጫዋች አይደለምን?… ግና ምን ተሸለመ? አሊያም ምን ተደረገለት? ብለን ስንጠይቅ…“ምንም የተደረገልኝ ነገር የለም… በርግጥ የፌዴሬሽኑ ፕሬዝዳንት ሲያገኙኝ በክብር ያናግሩኛል… ሌላው ቀርቶ ባበረከትነው አስተዋፅኦ አማካኝነት የተሰጠንን የእድሜ ልክ የነፃ መግቢያ ትኬት ሰረዙት::”… ሲል ባንድ ወቅት የተናገረው መልስ ይሆነንና እንገረማለን… ግን የነሱ የነፃ መግቢያ ትኬት ቢሰረዝና ከፍለው እንዲገቡ ቢደረግ ለአገሪቷ የኢኮኖሚ እድገት አስተዋፅኦ ያደርጋል ተብሎ ታስቦ ይሁን?… aha… ብሽቅ አለ ጋስ ስብሃት!…
አዋድ ግን ይቀጥላል “እኔ ባበረከትኩት ውለታ ደስ እንዲለኝ… ወጣቶቹ እኛን እያዩ መበረታቻ እንዲሆናቸው እንጂ እኔ የምከፍለው እስካለኝ ድረስ ከፍዬ ‘ገባለሁ… ደግሞም ይመስገን በኑሮዬ ደስተኛ ነኝ” ይሄን ሲናገር ያየሁበት የፊት ገፅታ ውል ሲለኝና የነሰለሃዲን የአሸናፊነት ድል መታሰቢያነቱ ለድሮው ጠቅላይ ሚኒስትራችን ሆነ መባሉን ስሰማ… የምር ገረመኝ!… ገርሞ… ገርሞ… ደግሞ ገረመኝ!
በበኩሌ ያለፉት ጠቅላይ ሚኒስትራችን ቢዘከሩ ቅንጣት አይከፋኝም!… ግን ደግሞ እንደ መንግስቱ ወርቁ ያሉ ብርቅዬ የኢትዮጵያ ልጆች አሊያም የዛኔው ቡድን ቢዘከርበት (መዘከሩ ካስፈለገ) የበለጠ ትርጉም አይኖረው ይሆን?!… እነ አዳነ፣ እነ ሳላሃዲን፣ እነ ደጉ እና መላው የቡድኑ አባላትስ ቢሆኑ ታሪክ ቀያሪ ከመሆናቸውም በላይ የበለጠ ታሪክ እንዲሰሩ፣ ነገ እነሱም የሚዘከሩበት ስም እንዲተክሉ የተሻለ የሞራል ብርታት አይሆናቸው ይሆን?… በደስታ ጊዜ የሚደረጉ ማናቸውም ነገሮች ነገ የበለጠ ደስታ የሚያስገኙ፣ ለተሻለ ፍሬ የሚያበቁ ቢሆኑ ደስ ይላል… በርግጥም የተሻለ ነገር ያመጣሉና!… ቱ!… ድንቄም ምክር እቴ!…
ደግሞ ይሄን ስላልን አንዳንድ የዋህ ደጋፊዎች ተነስታችሁ “ፀረ ልማት፣ ፀረ እድገት” ምናምን የሚል የሽብር ታርጋችሁን ለመለጠፍ ብትሯሯጡ… እንዲሁም አንዳንድ ከንቱ ተቃዋሚዎች መንገድ አገኘን በሚል የዘለፋ ውርጅብኛችሁን ለማውረድ ብትውተረተሩ አሁንም ገርሞ… ገርሞ… ደግሞ ገረመኝ!… ከማለት ሌላ የምንለው አይኖረንም!… aha… እስቲ ኳስን በኳስነቱ ብቻ ወደ ተሻለ ደረጃ ከፍ እንዲያደርጉት እነዚህን ምርጥ ልጆች እናበረታታቻው… ያ ሲሆን ብዙ ምርጥ ምርጥ ተተኪ ታዳጊዎችን ማፍራት ይቻላልና. . .
እዚህ ጋር Tessema Simachew የተባለ የፌስ ቡክ ወዳጃችን ከድል በኋላ የለጠፈውን ብዋሰው ውስጤ ያለውን የበለጠ ይገልፅልኝ ይመስለኛል…  “እንዲህ አይነት ቀኖች ያለፈው ጊዜ ማብቅያ ብቻ አይደሉም፣ የመጭው ጊዜም መጀመሪያ ናቸው። ነገ ኳስ ይዘው ወደ ሜዳ የሚሄዱ ህጻናት ሳልሃዲን ሰይድን ወይም አዳነ ግርማን መሆን ስለሚፈልጉ በደስታ ይጫወታሉ። ከዚህ በኋላ ለሌላ አስርት አመታት የበይ ተመልካች በእርግጠኝነት አንሆንም። የሽንፈት ታሪካችንን ስለሰበራችሁልን፣ ጀግኖቻችን ናችሁ።” ክበርልኝ ተሰማ! . . .
ከጨዋታው በፊት ቡድናችንን ይቅናችሁ ስል እንዲህ የሚል ዱዓ የፌስ ቡክ ግድግዳዬ ላይ ለጥፌ ነበር
አዳነ ሳላሃዲን፣ ሳላሃዲን አዳነ
የእምዬ ክብር በናንተ ተጫነ
እንግዲህ አደራችሁን ብርታት አይራቃችሁ
እምዬ እናት ዓለም ዛሬ ትኩራባችሁ . . .ዱዓና ጸሎታችን ተሰማና በስም የተጠሩት ተጫዋቾች እምዬን ታደጓት (እንደ አባባ ታምራት መጠንቆል አማረኝ እንዴ ?!… aha)… ብቻ  የሆነ  ሆኖ በጭፈራ ውስጥ ሆነን ደግሞ እንዲህ አልን…
አዳነ፣ ሳላሃዲን፣ ሰላሃዲን፣ አዳነ
አገር ከህመሙ በናንተ እግር ዳነ
ስኬት ብልፅግና ይብዛላችሁ
ደስታ ዛሬ ለሰራችሁት ለህያው ውለታ . . . !
እልል በይ ሃገሬ በይ ኩሪ ጨፍሪ
ነገ ደግሞ ሌላ ፈርጦች ልታፈሪ . . . !ክብርና ምስጋና ለመላው የኢትዮጵያ ብሔራዊ ቡድን አባላት…
ሁሌም ሰላም እና ዘላለማዊ ፍቅር ለኢትዮጵያችን…
ነገ ደሞ የተሻለ ይሆናል . . . ኢንሻአላህ!
 
Leave a comment

Posted by on November 3, 2012 in ስብጥርጥር

 

ሰላም !

የተሰማንን እንተነፍሰው ዘንድ ሰዋዊ ተፈጥሯችን ግድ ይለናል!… አረረም መረረም እንዳሰብነው እንፅፋለን!… እንደፃፍነውም እናስባለን!… ሁሌም ሰላም!…. ሁሌም ፍቅር ለሁላችን!… ሰላምና ፍቅር እስካለን ድረስ ብዙ ገር ነገሮችን በገር ልቦና እንጋራለን…  ኢንሻአላህ!…

 
2 Comments

Posted by on November 2, 2012 in ስብጥርጥር